កណ្តាល ៖ ជនសង្ស័យ២នាក់ត្រូវបានលើក្នគរបាលប៉ុស្តិ៍កករាំងយ៉ូវឃាត់ខ្លួនក្នុងករណីជួញដូរ ដោយខុសច្បាប់នូវសារធាតុញៀន (ម៉ាទឹកកក) នាថ្ងៃសុក្រ ទី០៤ ខែធ្នូ ឆ្នាំ២០២១ វេលាម៉ោង៨និង៥៦នាទីយប់ នៅចំណុចស្ថិតនៅលើផ្លូវលំ ភូមិស្វាយដំណាក់ ឃុំក្រាំងយ៉ូវ ស្រុកស្អាង ខេត្តកណ្តាល។
សមត្ថកិច្ចនគរបាលប្រាប់ឲ្យដឹងថា ជនសង្ស័យ២នាក់រួមមាន ១-ឈ្មោះ ផន ឡេង ហៅឆាង ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ធំឃុំ ក្រាំងយ៉ូវ ស្រុកស្អាង ខេត្តកណ្តាល និង២-ឈ្មោះ ចាន់ថន សុខនី ភេទប្រុស អាយុ២៧ឆ្នាំជនជាតិខ្មែរ មុខរបរមិនពិតប្រាកដ មានទីលំនៅភូមិធំ ឃុំក្រាំងយ៉ូវ ស្រុកស្អាង ខេត្តកណ្តាល(ធ្លាប់ជាប់ពន្ធនាគារខេត្តកណ្ដាលចំនួន ០១ លើក ពីបទលួច រយៈពេល០២ឆ្នាំ)
វត្ថុតាងចាប់យករួមមាន ១-ម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន ១៩កញ្ចប់(តូច១២កញ្ចប់និងមធ្យម០៧កញ្ចប់)សម្ភារៈប្រើប្រាស់គ្រឿងញៀនមួយចំនួន:២-ទូរសព្ទចំនួន០២គ្រឿងម៉ាក អិនចុចពិល ពណ៌ខ្មៅនិងពណ៌ក្រហមនិង៣-ម៉ូតូចំនួន០១គ្រឿងម៉ាកសាន់យ៉ាន់ ពណ៌ខ្មៅ ស្លាកលេខគ្មាន។
សមត្ថកិច្ចនគរបាលបានបន្តថា ដំបូងកម្លាំងប៉ូលិសប៉ុស្តិ៍រដ្ឋបាលក្រាំងយ៉ូវ បានចេញល្បាតការពារសន្តិសុខជូនប្រជាពលរដ្ឋក្នុងមូលដ្ឋាន លុះដល់ចំណុចកើតហេតុក៏បានឃើញជនសង្ស័យឈ្មោះ ផន ឡេង និងឈ្មោះចាន់ថន សុខនី កំពុងជិះម៉ូតូឌុបគ្នាទើបប៉ូលិសហៅឱ្យឈប់ដើម្បីធ្វើការត្រួតពិនិត្យតែជនសង្ស័យបានបោះគ្រឿងញៀនចោលចម្ងាយពីខ្លួនប្រហែល១០ម៉ែត្រ រួចប៉ូលិសបានរកឃើញម្សៅក្រាមពណ៌សថ្លាសង្ស័យជាគ្រឿងញៀន(ម៉ាទឹកក)ចំនួន១៩កញ្ចប់ រួចនាំខ្លួនជនសង្ស័យមកប៉ុស្តិ៍ឃុំក្រាំងយ៉ូវ ដើម្បីសាកសួរ ។
នៅចំពោះមុខសមត្ថកិច្ច, ឈ្មោះ ផន ឡេង បានសារភាពថា «គ្រឿងញៀនខាងលើមិនមែនជារបស់ខ្លួនទេ»។ចំណែកឈ្មោះ ចាន់ ថនសុខនីបានសារភាពថា «គ្រឿងញៀនខាងលើជារបស់ឈ្មោះ ផន ឡេង បានឱ្យខ្លួនអ្នកកាន់ពេលឃើញប៉ូលិស, ខ្លួនបានបោះចោលតែម្តង»។
បច្ចុប្បន្នជនសង្ស័យរួមជាមួយវត្ថុតាងខាងលើបានបញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងតាមនីតិវីធី៕
